مصر بلدنا طالعه تنادى
يبدو أننى تناسيت فى هوجة الأحداث السابقة أن هذه مدونة شخصية، وليست مسردة أحداث.
ولذلك فسأسمح لنفسى ان أحادث نفسى على صفحات هذه المدونة.
----------
عندى علم مصر متوسط الحجم، كنت لاقيته فى الشارع واقع ايام كأس افريقية ، وبما انى ناوى -ان شاء الله- اروح عند قسم قصر النيل، فقمت جايب العلم، وطلعت صباع روج وكتبت عليه ( حق الشرقاوي - حق مصر )
وعلقته على الدولاب على شان الروج ينشف وميبهتش على العلم أما يطبق.
طبعا الحاجة الوالدة شافت العلم متعلق على الدولاب بالى مكتوب عليه، وبما انها عارفه انى بنزل مظاهرات.. وبما انى الحيلة ووحيد تماما فبيتعملى حفلة مع كل مظاهرة اكون نازلها.
ولكن ما بيدها حيلة، لانى عودتها وعودت نفسى من حوالى 6 سنين، انى بعمل الى مقتنع بيه ، ومحدش بيقدر يثنينى عن الى عايزة.
.
لغايه كدا الموضوع تمام، هى شافت العلم وسكتت. النهارده الصبح لاقيتها بتصحينى من النوم ( ودا خرق صريح لحقوقى فى البيت يدل على ان هناك مصيبة ) طبعا قومت متحفز انى ازعق وادافع بشراسة عن حقوق النوم فى البيت بدون ما حد يصحينى.
.
لاقيت وشها مخطوف وبتقلى تعالى عايزاك، قلتلها ااااجى فين ؟ قالتى تعالى برة (ايقنت ان هناك شئ غير عادى) خرجت برة وقلتلها فى ايه.
.
لاقيتها بتقلى ان هى اتفرجت على برنامج رولا خارسا امبارح ( وكان بيتكلم على 11 شاب امن الدولة خطفتهم من البيت من قعدتهم على النت )
.
انا بقعد على النت حوالى 16 ساعه فى اليوم بس مش معنى كدا ابدا ان امن الدولة بياخدوا الى بيعدوا على النت كتير، قلتلها هاتى من الاااخر ، فى ايه ، قالتلى انا خايفة عليك ( طبعا الاسطوانة اياها هاتشتغل) انا ااستعديت للزمجرة لان مش على شان تكرر كلام انا عارفه تصحينى من النوم .
.
ولكن عبس وجهة أمى وإحساسي بوشوكها على البكاء اخرسني تماما.
قلتلها فى ايه ياماما ، امن الدولة مش بتاخد غير شباب الاخوان من بيوتها .
.
قالتلى لاء دول مش اخوان، وانت قولتلى ان فى ناس تعرفها محبوسة فى امن الدولة ( الكلام دا اما فرجتها على برنامج الجزيرة).
قلتلها طيب دول مش الى رولا خارسة بتتكلم عليهم .
بكت امى..
وقالت ان قلبها مقبوض تماما منذ البارحة ، وانى لو كنت بحبها فعلاً فمنزلش اروح المظاهرات ديه تانى واشيل علم مصر الى جوا دا.
.
مش عارف ليه ساعتها افتكرت الشرقاوي، وافتكرت جملة كنت قريتها على لسانه معناها ان ليه أمين ( مصر وأمه الحقيقية) ..
انا بقيت مش عارف اسمع كلام انهى أم فيهم، مصر ولا أمى.
.
من كام يوم قريت رد فى مدونة واحد ( مش فاكر اسمه ) بيقول انه أعتزل النضال والمظاهرات، وكان تبريره لاعتزاله، ان مصر ليها ابناء كتير اوى يحققولها احلامها، بس احلامه هو، ملهاش غيره.
.
رنت فى ودنى جمله مكتوبة فى شريط الأخبار فى مدونة http://x-ist.blogspot.com/ (( ولا عزاء للجبناء ))
مبقتش عارف ارد عليها اقلها ايه ..
سالتها وقلتلها يعنى ااقطع علم مصر الى جوا دا ومروحش المظاهره..
قالتلى اه. على شان خاطرى وعلى شان قلبي ميتوجعش عليك. (( مخدتش بالها من لفظة -أقطع))
.
انا قايلها قاصد، قلتلها ازاى يا ماما اقطع علم مصر، مصر ملهاش غيرى زى ما انتى ملكيش غيرى.
.
مش هاقدر اقعد فى حضنك هنا فى البيت، فى الوقت الى مصر بتنده فيه على ولادها الرجالة..
وانتى ولدتينى راجل يا ست الكل ..
وتركتها ودخلت ))
------------
.
ارفع راسك يا شرقاوي
واهتف بالصوت الحياني
.
مصر بلدنا طالعة تنادي
عالرجالة فى أرض بلادي
.
مصر بلدنا طالعة تنادي
عالكرامة فى أرض بلادي
-------------
انا جاى يا مصر النهاردة -ان شاء الله- على شان حق الشرقاوي وحقك وحقنا.
حقنا الى بقالنا كتير اوى اوى مش عارفين ناخده.
.
مش هاعد فى البيت أحسبن وادعى على الحكومة وسنين الحكومة وعلى حالنا وحال البلد وامصمص فشفايفى.
هانزل اقولهالهم فى وشهم
(كفااااايـــــــــــــة).
وربنا يسهل.
posted by mohamed_ied @ ١:٠٧ م
11 comments
11 Comments:
طول عمرى عرفاك راجل والله يا جهبذ
اينعم انا عينيا على العلم يا خويا الى انت خدته يوميها
ده انا نسياه خااالص
بس مش هاقول حاجه غير ان ده جهبذ الى انا عرفاه
بكيتنى يا محمد وأنا أقرأ مقالتك... ربنا يكرمك انت وكل شبابنا..نفسى بكون عندى الشجاعة انى اكون معاكم.. ربنا يخرج شرقاوى وكل الشباب بالسلامة..
ربنا يرجعك لمصر بالسلامة
بص يا محمد انا حبيت اكتبلك الكلمة الله فاتت دى فى كومنت لوحدها علشان خاطر حاجة واحدة
انت فى لحظة نسيت امك الكبيرة
و لما رجعتلها انا قلت لك حمد لله على السلامة
بص يا محمد انا امى نشطه فى الحزب الوطنى
خاينه يعنى من الاخر
مرة قلت لها انا صعبان على اللى هايتعمل فيكى بعد ما الطاغيه يسقط
انا عندى فى البيت مع انى وحيد بس دربتهم انهم مالهمش دعوة بيا اتجوز وقت ما اعوز و اطلق وقت ما اعوز و مش بيشوفونى الا زيارات
الامهات بطبعها بتخاف و الخوف دة الله يخرب بيت امه متملك من الناس كلها طيب يا جدعان لو سيبنا مصر كدة مين الىل هايتكلم انا خلاص على اخرى من الموضوع دة اشباح الخوف بتطاردنى فى وشوش صحابى كلهم كل واحد بايع القضيه و مكبر دماغه و تكلمه يقولك انا بحب مصر و قال يعنى انتوا اللى هاتعدلوا المايله يا عم بطل صداع و النبى
و يقعدوا على القهوة طيب و بعدين
هانسيبها كدة و نحقق للطاغيه اللى فى مزاجه
انا على فكرة هاكتب موضوع لانى اتأثرت بكلام والدتك دة يا ريت تبقى تتابعه و تقولى ايه رائيك فيه و يا ريت كمان لو ضبفتنى على الميل الميل هاتلاقيه فى البروفيل بتاعى
اسيبك دلوقت يا محمد و يا ريت تضيفنى فعلا
شوف يا ابنى أقعد جنب أمك أحسن ومصر لو عاوزاك حأبقى أخليها تعدى عليك فى البيت.....
قبل ما تسخن وتقول عليا عميل ومن أمن الخرا الدوله أفهم كويس نضال المراهقين ده مش هيغير حاجه وأمن الدوله مش هتفرق معاه كتير لما يعتقل ويسحل كام 100 واحد زياده.
دى مش دعوه لليأس بس نعقل ونفكر لأن الموضوع محتاج ثورة شعبيه وليس اقل من ذلك.
منار
ميرسي جدا على كلامك، بس أى انسان موجود جواه (ضعف وخوف)، وبيزداد الضعف دا اما يتعلق الموضوع بأمه بالأخص، وبيزداد جدا الخوف اما بيتعلق الموضوع بالأذى الجسدي كالتعذيب وإلخ..
ومش بعيد أى حد يتاخد من المظاهرات بعد كدا يعذبوه زى ما عذبوا الشرقاوي، الله أعلم ديه هاتبقا سياستهم بعد كدا ولا لاء.
عموما إلى عايز اقوله أن الخوف موجود والضعف موجود، بس الأنسان لازم يتغلب عليهم
من المستحيل قتلهم، بس المفروض نتغلب عليهم. وساعات الخوف او الضعف بيتغلب على الشخص، ودا الى نفسي ميحصليش
ان شاء الله مش هايحصلي
عمومًا، انا سعيد جدا جدا بتواجدك وردك عندي فى المدونة..
وياريت يتكرر دا تاني، اما بالنسبة لموضوع العَلم الى كنتي عايزاه، فأتكلي على الله، معندناش أعلام. انا قطعته خلاص
(*_^)
reham
سعيد بردك، وأسف لو كان كلامي بكاكِ، بس ايه الى يمنع انك تكوني معانا
انا أتمني ان كل واحد متعاطف زيك يخرج معانا، ساعتها الوضع هايتغير تمامااااا، لأن المتعاطين كتيرررررر اوى ، فساعتها هانكون كتير جدااااا
اكتر مما تتخيلى
يارب فعلا يا ريهام متكتفوش بالتعاطف ، يارب.. ولو الى بيمنعك من الخروج أهلك، فحاولى معاهم اكتر من مرا.
خروج المتعاطفين هو امل كبير لينا
لانكم فاهمين القضية وفاهمين الى بيحصل ، التعتيم الأعلامي مش مأثر عليكم زى بقية الشعب ..
يبقا فاضل ايه؟ الى فاضل بس هو التغلب على الشئ الى بيمنعكم من الخروج دا. مش زى بقية فئات الشعب والى لازم نغير الايدلوجية بتاعتهم اصلا ونفهمهم القضية ونحاول نصحيهم ونوريهم الواقع الى فعلا عايشين فيه.
انتوا فاضل فى مشوار تواجدكم معانا قيد أنملة
انما الى فاضل مع الناس التانيه، طريق كامل
أتمني أن تحاولى التغلب على الشئ الذى بيمنعك من الخروج معنا.
سلامى لكِ ولكل من هو فى موقفك
Mr.GEMYHOoOD
ما أريد قوله لك لن يكفيه مجرد كومنت،
ولن يكفيه مساحة ضئيلة كالمتاحة هنا.
سأضيفك على المسنجر الأن، وأتمني أن أراك متصل كى أتحدث معك
وأكيد انا متابع لمدونتك، بإنتظار ظهورك اون لاين
الأستاذ Anonymous
اقعد جنب أمي مين ؟؟ امال انا بعمل ايه ما انا بقعد جنب امى مصر برضوا
وخد بالك انا مش من الناس الى بتعمل الناس وبتقول عليهم من بتوع امن الدولة والخرة دا ، لان بالعكس جدااا بتوع امن الدولة بيكونوا فاهمين اكتر منى ومنك
انت ممكن تكون مش فاهم بس. عموما انا هاشرحلك
امن الدولة مش هاتفرق معاهم 100 ولا 500ولا الحكومة هاتفرق معاها ، لان فى حادثه واحدة زى العبارة بيموت 1000 واحد
المفروض الى يفرق معاهم الشعب، واحنا بنخاطب الشعب، الصور الى بناخدها للضرب الى بيحصلنا، ديه للشعب، الضرب ذاته الى بنضربه والنزول الى بننزله فى المظاهرات دا لينا وللشعب، مش للحكومة.
ايضا نحن لا نريد من الحكومة ان يفرق معها حبس 500 واحد .
ولكن ان يناقش الكونجرس الأمريكى قطع المعونة عن مصر لتباطؤ الصلاح السياسي ومعاملتها للمتظاهرين السياسين
واخد بالك الكونجرس كان بيناقش ايه، كان بيناقش قطع المعونة عن مصر، احنا فى الاول والاخر مش عايزنها تتقطع اكيد، بس كفاية الصفعة الى اتوجت للنظام
ايضا التنديدالى وجهة الإتحاد الاوربي (تقريبا)للنظام المصري . يندد فيه جدااا بتصرفات الحكومة تجاه المتظاهرين السياسيين، وكان فى كلام كتير كللله ضد النظام بشكل صريح، وخرج مليون متحدث عن الخارجية المصرية بينفى الكلام دا وبيشجب وبيرفض التدخل فى شئونة. وبيقول انه محصلش والخ الخ.
ديه كلها صعقات كهربائية للنظام، عمرها ما كانت هاتتحصل لولا تحركنا نحن ابناء هذا الوطن ونزولنا فى تظاهرات وتلقينا الضرب والسحل والأغتصاب والخ. من المهازل التى تحدث
بهذه التضحيات فقط، تلقت الادارة تلك الصفعات
هذا هو ما سيؤثر فى أمن الدولة وى الحكومة.
الى حصل فى الشرقاوي اتكلمت عليه ميت مجله منهم المصري والعربي والأمريكى والعالمى.
اكيد تعذيب الشرقاوي مش فارق معاهم، بس تداعيات التعذيب والرأى العام المصري والعربى والعالمي هو الى هايفرق معاهم، اتمنى انك تكون فهمت شئ
اما على نقطة المراهقين.
فاسمح لى المراهقين دول ارجل منك مليون مرة .. انت قاعد فى بيتكم وبس.
كمان مش بتندب ولا بتمصمص شفايفك على الى بيحصل.
لاء دا انت عايز الى بيخرجوا يقعدوا فى بيوتهم كمان ، يعنى زى الى مبيصليش، لاء، دا انت بتنهى الناس عن الصلاة
المهم.. انت بتقول ثورة شعبية
هو انت مش من الشعب دا .
لو مش من الشعب دا ياريت تسكت خاللللص
اما لو انت من الشعب دا ، عايز الثورة تحصل فى لحظة نلاقى الشعب قايم خارج فى الشوارع يسقط حسني مبارك ويحتل القصر الجمهورى، وانت تنزل معاهم ساعتها لان فيه ثورة شعبية ..
كلامك ينم عن عدم فهم مطلق للسياسة، احنا ياباشا بالضرب الى بنضربه دا بنعمل حالة احتقان واختناق للشعب ، لأننا بنكشف ليهم حقيقة الحكومة.
الى بتقول على نفسها أزهى عصور الديمقراطية
كمان فكرتني برئيس حزب التجمع تقريبا اما قال حركة كفاية ديه ( حركة عيال)
البيه عايز النضال السياسي يبقا من على السرير. على راى الى قالها مناضلين السرير
وانا دلوقتى بقله بص شو نضالنا نضال العيال، خلى الكونجرس يناقش رفع المعونة من على مصر او تقليصها .
يعنى عملنا الى ولا هو ولا حزبة ولا اى حزب فى الدنيا عرف يعمله .
احنا خلينا النظام يتلفت حوالين نفسه مليون مرة قبل ان يصفع او يهين اى مواطن مصري.
ولكنه يحدث احيانا لبعض السياسات التى يتبعونها
عموما نحن فى حرب ويجب ان تكون هناك الكثير من الاخفاقات والنجاحات.
انا ياباشا بوجهلك الكلام دا برضوا، شفت نضال المراهقين بيعمل ايه.
ياريت لو انت انسان فعلا صادق مع نفسك متجادلش من احل المحادلة وخش رد عليا بكل هدوء.. ولو كنت شفت الموضوع بشكل اخر اما بصيتله من وجه النظر بتاعتنا ولقيت اننا على صواب ياريت تقول برضوا
سلامي لك.
سأحاول الرد عليك بهدوء-مراعاة لسنين عمرى التى هى اكثر من ضعف عمرك- كما طلبت رغم أنك لم تلتزم بالهدوء وسخنت كما توقعت وحذرتك ردى سألخصه فى النقاط التاليه:
1)مناقشة قطع الحسنه "المعونه" الأمريكيه فى الكونجرس لا يهز نظامنا الديكتاتورى العتيد ولا يمثل له اى صفعه "راجع سيناريوهات العقوبات الأقتصاديه فى العراق وغيرها ومن قبلهم مصر فى عهد الزعيم عبد الناصر أول من خربها وترك للباقين مهمة الجلوس على تلها".
2)منذ أكثر من خمسون عاما وأغلى شباب ورجال مصر يتم أعتقالهم وسحلهم و...و.
بأنتظام شديد ولم يتغير شيئ لا فى حال البلد ولا فى السياسه. "راجع تايخ مصر الحديث منذ ثورة العسكر حتى الان"
3)نعتك السخيف لى بالجهل وبأنك وزملائك المراهقين أرجل منى مليون مرة رغم انك لا تعرفنى ولا تعرف مواقفى ولا ثقافتى يؤكد وجهة نظرى فى أن القسم الأعظم من المناضلين الجدد اللى حضرتك منهم مع الأسف جهله ومراهقين سياسيا.
4)اما عن تساؤللك اذا كنت من هذا الشعب وأعرفه ام لا فأنا يا عزيزى أنتمى لهذا الشعب العظيم حتى النخاع وكلامى عن الثورة الشعبيه الذى لم تفهمه مقصود به تحرك الغلابه المنسيين المهمومين بلقمة العيش وليس المثقفين المهوسين بالنضال الحنجورى والمندس فى وسطهم المعرسين والمهوسين دينيا واللاهثين وراء قطعه من التورتة حين يحدث التغيير وما قد يصحبه من فوضى .أرجوا أن تكون قد فهمت الكلام والتشبيه بعيدا عن السطحيه.
اخر الكلام انا أحترم كل من له وجهة نظر حتى لو أختلف معه وتحياتى لكل من يحاول التعبير عن رأيه لكن اقرأوا تاريخ كويس حتى لا تضبع الجهود سدى.
تحياتى للجميع وللحديث بقيه ان كان هناك قضيه وفى العمر بقيه.
شكراً جداً لك يا محمد على تشجيعك لىً وأوعدك إنى هعمل كل مافى وسعى لأكون معكم فى محاولة بسيطة منى للتعبير عن رفضى للنظام القاسى الذى نعيشه.. ولكن إسمح لى بتعليق على المناقشة بينك و بين الأستاذ أنونيمس!! قبل ما ابتدى أحب أوضح إنى مقدرش أقول عن نفسى مثقفة تاريخياً ولا سياساً حتى أثبت رأى بحجج مقنعةأو مؤرخة!! لكن كل إللى أقدر أقولوه إنى بنت مصرية عادية جداً بتحب بلدها بشكل مكنتش حاسة بيه إلا لما عدى علىً ظروف خاصة حسسستنى إن مهما البلد دى عملت فىً بموت فيها وفى ترابها!
تفاعلى وانفعالاتى كلها نابعة من حبى للبلد وأهلها وكرهى الشديد للظلم والنهب إللى إحنا عايشين فيه!!
محمد
أنا بحترم جداً رأيك وبصراحة من غير إللى عملتوه أناإحتمال كبير كنت فضلت مُغيبةومش مدركةأوى كدة لأبعاد إللى بيحصل فى البلد..يعنى عادى! زى كل الناس عايشين وخلاص!! بشكركم جداً ولكن أنا شايفة إن لازم عشان صوتنا يكون مسموع.. نستفيد من إللى سبقونا عشان الناس ديه خبرتهاأكبر وديه حاجة لازم تُحترم!!
الأستاذ Anonymous
أول كومنت قلته كان رد فعل محمد عليه طبيعى جداً لأنك بتكلم شاب فى منتهى الحماسة والثورة ومتنساش إن أعز أصحابه إللى مشاركينه فكره وآراءه وطريقه مرميين فى السجن عشان بيقولوه رأيهم وأعتقد ديه حاجة تحرق!! وكمان متنساش بما إن عمرك أكثر من ضعف عمر محمد يبقى أكيد عدت عليك مشاعر وأحاسيس الشباب إللى هو بيعيشها دلوقتى وإللى من غيرها مكنش هيبقى فيه شباب واعى للى بيحصل لكن محتاج توجيه من أمثالك مش استهزاء و إستهتار بالمشاعر (أقعد جنب أمك).. خلى بالك إن الثورة الوحيدة إللى فى مصر إللى شالت ملك من مكانه كانت ثورة الظباط الاحرار إللى شالت الملك فاروق.. ده معناه إن لازم يكون فيه إنقلاب عسكرى من جوه الجيش نفسه (وده لا يمكن يحصل عشان الجيش واكل كويس أوى)مفيش قدامنا غير الطريق الصعب وهو إللى محمد وأمثاله بيعملوه عشان الدنيا والزمان إختلف لكن الظلم فى أى وقت واحد ورد الفعل عليه فى أى زمان برده واحد وإن إختلفت الطريقة
ربنا معاك ومعانا يا محمد ;o)
الأستاذ Anonymous
ليكن ردى منظمًا كما كان ردك، كى نستطيع الأتفاق على نقطة وما ولا يكن الحوار مجرد مجادلة لا طائل من ورائها
أولاً لستُ صغيرًا فى السن كما تتوقع أنا أبلغ من العمر 23 عامًا، ومن قال أن عقل المرء يقاس بسنين عمره، حمدًا لله أنا كاتب ويوجد كتابان فى السوق يحملان أسمي، كما أننى أقوم على تحرير باب فى إحدى المجلات المشهورة جدًا فى عالم الأنترنت
أولاً: أنا لم اُثار من لاشيء، جملتك الأولي (خليك جنب أمك) كما قالت
Reham
جملة أستفزازية جدًا، ليس على مَن فى عمرى أن يقاوم إغراء الإستفزاز الذى سببته تلك الجملة
عمومًا لنترك ما كان، ولنتجه بالحديث إلى النقاط الى فندتها فى ردك
ثانيًا: انا لا أتفق معك فى نظرتك لسيناريو المعونة، المعونة ليست مجرد أموال، المعونة التى تتلقاها مصر تنم عن تأيد مطلق وكارت أخضر للنظام المصري فى تصرفاته وسياسته
هنالك فرق شاسع بيننا وبين العراق او بين مصر أيام جمال عبد الناصر، يا أستاذي الفاضل أيام جمال عبد الناصر كانت مصر تحت جناح السوفيت أكثر من أمريكا بكثير، كانت هناك قوي أخرى فى العالم تتخذها مصر حاميٍ لها
هل تتذكر العدوان الثلاثي، هل تتذكر تايد الأمريكان ومن ثَم موقف السوفيت والخطبة الجلاء التى خلع فيها رئيس الاتحاد السوفيتى الجزمة ووضعها على المنصة قائلا ( إن لم تخرج فرنسا واسرائيل وانجلترا من مصر.. فليس عندى سوى هذا، ومن ثَم خلع حذائه ولوح به) حينها أتى الإنزار الأمريكي بالخروج الفوري من مصر)
انا لا استطرد ولكنني أقص عليك مثالاً يوضح ما أريد قولة
مصر الأن موالية تماما لأمريكا -حتى أن مسماها (الراعية الأولي للولايات المتحدة الأمريكية فى منطقة الشرق الأوسط بعد إسرائيل)- ومن المؤكد ان النظام المصري يحتاج للتأيد الأمريكي جدا، لان النظام لن تقوم له قائمة يوم واحد،دون مباركة البيت الأبيض، أما أيام جمال عبد الناصر فكانت مصر مهتمة بمباركة السوفيت وليست أمريكا
اما على العراق فصدقني مثال العراق يؤيد ما اقولة تمام التأيد.. النظام العراقى رفض الإمتثال لامريكا وحدث ما نعرفه جميعًا، ماذا حدث ياتُرى؟؟ صدام حسين ملقى فى السجون الأمريكية ، هل يريد الطاغية محمد حسني مبارك هذا ؟ بالتأكيد لا، وبالتأكيد جميع دول المنطقة كالأردن ومصر -الموالين لأمريكا- تعلموا الدرس جيدًا.
هذا ردًا على أولاً لديك، ويتضح من ملخص حديثى أن مصر الأن ليست كسابقها ، فمصر موالية لأمريكا تماما وتحتاج للمعونة التى ليست مجرد اموال بل هى تأيد مطلق للنظام فى أفعالة.
وأظن ان أخر ما يوده النظام هو سحب المباركة الأمريكية عنه، ولو كان كلامك صحيح، ما كانت زياة جمال مبارك كي يتسجدي العطف والتأيد مرة أخري
ثالثًا: انا معك ان خيرة الشباب يعتقلون والخ الخ من قديم الأزل والحال كما هو عليه.. ولكنك أغفلت تطورات عظيمة الشأن ها هنا
فى السابق كان المختطفون والمعتقلون من قبل أمن الدولة لا يَعرف طريقهم شخص، كانت امن الدولة تسمي( وراء الشمس) ومن يذهب ور الشمس لا تراه عين، ولم يكن هناك من يجرء على أيصال ما يحدث للشعب فالجرائد الحكومية دائمًا ما توالس وتجمل الحكومة ، ولم يكن هناك غيرها
كانت قضايا المعتقلين حينها لا تثار أمام أفراد لشعب لأنه ليس هناك طريقة سوى الإعلام، والإعلام حينها كان يقوم بدوره فى التعتيم وإخفاء الحقائق وإنعدمت تماما قنوات التواصل سواء المقروئة أو المسموعة عدا بعض الجرائد الحرة مثل الدستور والخ، والتى كانت سرعان ما يتم غلقها.
اما الأن فلاحظ استاذي الفاضل ان هناك قنوات عديدة كالجزيرة ودريم والخ
هذه القنوات تصل لكل بيت فى مصر، أكاد أجزم انه لا توجد فى مصر شارع واحد ليس به وصلات الدش الشعبية ذات ال (20 جنية)، صدقني الجزيرة والحقيقة ودريم والخ من تلك القنوات التى تناقش وتوصل ما يحدث كاملاً أحدثت فرق مهول فيما يحدث، هل كان أحد منذ 15 عاما يسمع عن معتقل او حتى يعرف فى أى الأماكن مسجون، بالطبع لا . الأن 60 % من البيوت المصريه على علم بموضوع الشرقاوي والشعب فى حالة إختناق تحتاج للكثير والكثير من العمل وتحتاج للإستمرار فى النضال.
أيضًا المدونات والإنترنت والخ. عدد مستخدمين الانتر نت ى مصر لا يقل عن 5 مليون شخص، لو وضعنا فى الحسبان ان ال 5 مليون شخص هؤلاء ليسوا فرادة ، بل لهم أسر تتكون من 4 أفراد ( فى المتوسط )، سنجد ان لدينا 5 مليون اسرة بمتوسط 20 مليون شخص، يستفيدون ويعلمون ولو بقدر ضئيل الحداث التى تجرى ى هذه البلد
استاذي العزيز ، كل هذه قنوات تواصل تضمن لك انك تصل على اقل تقدير لربع الشعب سواء عبر الانترنت او القنوات الحرة، هذا يخبرك ان النضال فى هذه الايام له فارق كبير جدا.
((نعتك السخيف لى بالجهل وبأنك وزملائك المراهقين أرجل منى مليون مرة رغم انك لا تعرفنى ولا تعرف مواقفى ولا ثقافتى يؤكد وجهة نظرى فى أن القسم الأعظم من المناضلين الجدد اللى حضرتك منهم مع الأسف جهله ومراهقين سياسيا))
للأسف أستاذي الفاضل انت تكتب تحت مسمى Anonymous
وبدأت حديثك بجملة من المستحيل ان يبدأ بها محاور (خليك جنب امك ) فكيف تطلب منى ان اعرف من انت واعرف مواقفك؟ كى لا انعتك بالجاهل، عموما ردك الثاني اوضح بعض الأمور وأن كلماتى تصل لإنسان عاقل يفكر بعقله، من الممكن ان نختلف فى وجهات النظر ورؤيانا للموضوع، ولكننا متفقين على شئ، أننا مصريان نحب هذه البلد، وكلانا عاقل ، والجهل ليس مستفحل في أيٍ منا ، وان هناك أرضيه صلبة للنقاش -العقل-والتوصل لنقطة إتفاق.
اما عن بعض المندسين فأنا أتفق معك، ولكنك لو تلاحظ جميع الأحزاب مجتمعه تمام الإجتماع ، وهو ما لم يحدث فى مصر منذ عقود مضت
اينعم هناك المندسون وأصحاب المطامع، ولكن من قال أننا نود ان نحضر (إله) أخر إلى الحكم؟ نحن يا فاضلى لن نقبل مطلقا بالأحكام الجاهزة والرؤساء المسبقين. نحن نكافح كى نحصل على حرية إختيار الحاكم وحرية إختيار اعضاء مجلس الشعب
صدقني لو أتيت بملاك على كرسي الحكم وتركت له الحبل على الغارب سيتحول لحرامى اخر، ومستبد اخر. اما لو أتيت برئيس ابن ستين فى سبعين وحرامى، وكان هناك نواب شعب حقيقيون يحاكمونه ويحاسبونه كما يحدث فى دول العالم المتقدم، فسيسير هذا الرئيس على العجين ما يلخبطوش
المعادلة بسيطة، المال السائب يعلم السرقة، وقطيع الخرفان يغرى بوجود راعى بالعصا
نحن نريد حرية أختيار رئيس جمهورية والأهم حرية أختيار نواب للشعب لا يجعلون مالنا العام سائب
ونريد تليفزيون حر يقوم على توعية الناس اكثر فأكثر كى لا نتحول لقطيع خراف مرة أخرى
واعلم تمام العلم، الشعب الذى قدر على إزالة حاكم اسمه مبارك بعد 25 عام من الحكم وتولى جميع مناصب القرار، لن يكون صعب أمامه الإطاحة بحاكم فاسد جاء وجلس على الكرسى لعامان او ثلاث او حتى خمسه
فلتتحد فئات الشعب معًا لنحصل على حرية إختيا حاكم ونواب للشعب، حينها ستتحقق طرفى المعادلة التى حققتها الدولة المتقدمة.
حاكم للشعب، ومحاسبين لهذا الحاكم. وشعب واعى تُحترم كلمته.. قادر على الإطاحة بالإستبداد مرة أخرى.. من اين ستأتى الفوضى حينها؟
من الممكن ان تجد نظرتي للوضع يوتوبية أكثر من الازم، ولكن ثقتى فى هذا الشعب كبيرة.
بانتظار ردك على حديثى يا فاضلي.
Reham
لكى جُل تحياتي ، وقادم إليكي بتعقيب فى رد منفصل..
عزيزى محمد
اولا أبدأ ردى باعتذار فى صورة تبرير للهجة التى كتبت بها تعليقى الأول والتى كان منبعها الغضب والثورة لما يحدث لشباب غض متحمس لقضيه عادله ومشروعه قد يساء استغلاله من بعض الأطراف التى وصفتها فى تعليقى الثانى كما أنى لا أتحمل احتمال أن يعتقل ويعذب أبنى الذي هو أصغر منك ببضع سنوات وعليه فأنا أتفهم موقف السيده والدتك تماما.
ثانيا عندما تحدثت عن مواقف سابقه لمصر أو لدول أخرى من الشأن الأمريكى لم أقصد أبدا مصلحة البلاد وانما كنت أعنى تعنت الأنظمه التى تدفع بدولها الى الخراب كما يحدث فى العراق الان. جنون العظمه ياسيدى يدفع الى الهاويه. أما انت فتتحدث عن مصلحة البلد التى لا أعتقد أن لها وجود على قائمة جدول أعمال السادة العائله المباركيه الحاكمه.
اسمح لى أن أصحح لك معلومه تاريخيه مصر لم تلجأ لأحضان الروس الا بعد أن تعقد الموقف مع الأمريكان بسبب الغباء والجهل السياسى الذان تمتع بهما العسكر الحاكمون فى هذا الوقت بعد الانقلاب العسكرى الشير المسمى خطأ بالثوره.
ثالثا أتفق معك تماما فى أن التطور التكنولوجى منذ عقد ونيف وفر سبل المعرفه والاضطلاع على الأحداث التى هى أكثر من نصف الطريق نحو تغيير الوضع المؤسف لطريقة التعامل الأمنى مع التعبير عن الرأى.
كما أتفق معك أيضا فى أن الطريقه المثلى للحكم هى اختيار حاكم عن طريق الشعب ونواب أيضا عن طريق الشعب لمحاسبة هذا الحاكم اذا أخطأ.
ولكن.. -واة من لكن هذه- نحن شعب حرم من ممارسة الحياة السياسية السليمة منذ ألغى الصاغ جمال عبد الناصر الأحزاب السياسيه منذ أكثر من نصف قرن بحجه فساد الأحزاب ثم أعادها السادات صوريا منذ ثلاثين عاما بعد أن أفرغها من أى دور فعال. واذا اخذنا فى الأعتبار حاله الأميه المؤسفه التى عليها السواد الأعظم من الشعب هل تتوقع فى حالة التغيير أن يحسن الشعب اختيار نوابه وحاكمه؟؟؟ سؤال مطروح للنقاش الواعى الهادئ بعيدا عن الأتهامات والمذايدات لا أقصدك أنت يا محمد لكن أقصد أى محاور اخر.
الشعب الذى تثق فيه كل هذة الثقه رغم احترامى الشديد له واعتزازى بالانتماء له قد تم تدميره وتوجيهة لهدف أوحد هو لقمة العيش لست أعرف ان كنت تدرى أم لا الحاله المزريه التى عليها القسم الأعظم من شعبنا الحبيب الصورة قاتمه جدا.
عزيزى أقبل أختلاف بعض وجهات نظرنا لكننا كما قلت نتفق فى الأساسيات والتى هى عشق هذا البلد ورغبه جامحه فى أسترداد كرامتنا وحريتبا من أيدى المستعمر المصرى.
للك تحياتى وأيضا للعزيزه ريهام التى اعتقد أنها مثال للفتاة الواعيه التى تخطو أول خطواتها نحو المعرفه.
وللحديث بقيه ان كان هناك قضيه وفى العمر بقيه
PLEASE ADD ME
IWANT TO TALK WITH YOU
ALONE_2_ALONE@HOTMAIL.COM
إرسال تعليق
<< Home